Romano Hangos motto
ročník 9, číslo 7
vyšlo 2007-04-16

aktuální číslo
zprávy
rozhovor
názory
anketa
přílohy
reportáž
starší čísla
redakce
odkazy
e-mail



  O Roma pes kiden paš peste

Akana pes khatal e Anglija visaren pale but romane fameliji, kajča nane sakona famelija kodi bacht, kaj te avel pale andre peskero. Varesave fameliji sar džanas andre Anglija, ta bikende o khera u akana sar aven pale, ta len nane kaj te bešel. Krupkate paš e Teplica peske o Roma cinavkeren khera, u kiden pes paš peste. Davas pal kada duma le romeha savo pes vičhinel Alexander Zajac, u Teplicate les sako džanel sar le Šanis.

„Me dživav Teplicate imar penda berš, u prindžarav ode talam savore Romen. Kajča akana hin e situacija celkom aver, bo andre amaro the aver fori aven but neve romane fameliji, save angle peste roden nevo bešiben. Aven ode majbuter kole, save visaľon pale andal e Anglija. Hin oda terne manuša, u sar lenca vakerav, ta mange pharo pal koda, so imar predžidžile. Somas te dikhel andro foros Krupka, savo hin nadur khatal o Teplicatar. Ode pes kidle but neve romane fameliji, kajča o gadže kalestar darandžile, u denašen odarik. Bikenen peskere khera, u roden peske aver than, bo nakamen te dživel jekhetanes le Romenca. Akana ode Krupkende dživen buteder Roma sar gadže, u le Romenge ode igen lačhes, bo hine paš peste, likeren jekh avres u dičhol kaj pes lenge mište dživel te hinen pre jekh kopa. Vakerel pes te pal koda, kaj Ustende andre Matično čhivena tele kole khera kaj dživen o Roma, u jon avena te dživel andre Krupka, abo andre varesavo aver foros paš amende. Pal miri godži phenas, kaj oda nane lačhes, bo o gadže le Romenca keren manipulacija. Kole manuša save dživen pre jekh than bare berša, kamenas te ačhol pre peskero than, u hin ča pre lengeri dzeka so kamen te kerel. Te kamen te ačhol, mi ačhon. Te kamen te džal, mi džan. Me dživav Teplicate imar akorestar, kana pal o mariben avľam pro Čechi pal o Slovensko. Keravas buťi andre fabrika, u te avas sasto, ta kerav buťi dži adadžives. Čačipen hin, kaj adadžives pes buťi phares rodel, u ade anglo Roma buťi nane. Savore dživen le podporendar, kajča Eda nane lačho dživipen. Kole so sas andre Anglija phenen, kaj lenge sas igen mište bo phirenas te kerel, u zarodenas peske šukar love. Kade hin kajsi situacija, kaj o terne zorale murša bešen khere, u nane len so te kerel, u sar dikhav ta bi buťakere hin talam savore terne Roma. Krupkende hin Roma khatal aver fori, u denašle odarik bo len nasas sostar te dživel, kajča sar geľa jekh famelija, pal late džan aver, u kavke pes sgele savore pre jekh than u arakhle peske feder dživipen, bo hine savore paš peste, u jekh avreske pomožinen avke sar birinen. Amen o Roma samas kavke sikhade čirlatunestar, u akana avel pale kajsi situacija, kaj peske mušinaha jekh avreske te pomožinel, bo o dživipen hin igen pharo. Amen o phure imar varesar likeraha avri, kajča le ternen hin o dživipen anglal peste, u te manušes nane sostar te dživel, ta chockana kerel the diľiňipen. U kada avel pro Roma goreder the goreder. Adadžives the kole so sas barvaleder peren andro čoripen, bo len nane buťi, nane sostar te dživel. Sar dikhav, ta le Romen užarel koda, so len sas angomis pre Slovensko, u me džanav, kaj oda nasas igen lačhes.“

Ondřej Giňa

přečtěte si
-> Noviny ke stažení

téma

redakce
Romano Hangos/Romský hlas
vychází s podporou Ministerstva kultury ČR, vydává Společenství Romů na Moravě
Adresa redakce:
Francouzská 84, 602 00 Brno
tel.: +420 545 246 645
fax: +420 545 246 674
email: rhangos@volny.cz

vyhledávání



Radioľurnál

Radioľurnál