O ortodoxna pačande Rokycaňate arakhle paš peste 3. 9. bare manušes. Le Metropolitas Kryštos, savo avila te dikhel, sar pes phundravel nevi fara paš e khangeri Nejsvětější Trojice. Kada manuš, savo hino mekučeder paš o ortodoxna pre Čechiko the Sovensko sas arakhlo le čhibaleha Ing. Jan Baloun the le senatoriha MUDr. Luděk Sefzig.

Palis o Metropolita Kryštof lidžalas e sunto omša andre khangeri, savi lidžal o romano rašaj o David Dudáš. Majangluneder hin andre savoro koda, kaj andre nevi fara ela phundrado komunitno centrum, savo kerela buči le romane čhavorenca the le ternenca. Kada hin jek than Rokycaňate, kaj ela le Romenge kio vast. O ortodoxna Rokycaňate kavke hazden peskero interesis te del le romane čhavorenge the le ternenge na ča koleha, kaj angle lende kerena evangelizacija, ale the te dikhel pre koda, kaj len te avle kaja te džal, kana len nane so te kerel. Jekhetanes le romane aktivistenca pes kisitinel programos save pes pomožinela le romane čhavorenge andre savoreste, so lenge kampel andre škola. But važno hin the koda, kaj o romane čhavore siklona pal e romani historija, kultura tradiciji the romani čhib. Pal kada savoro denas duma le Metropolitaha Kryštof andre khangeri Nejsvětější Trojice ale the andre nevi fara, savi sas koda džives phundradži, u leha višvecimen the požehnimen.
O Metropolita Kryštof phendža sar but manušeske kampel o spiritualno dživipen, savo the adadžives, kana hin bari technika sikavel le manušen te džival pal koda, andre soste o manuša pačan imar buter sar duj ezera berša. „Kana avilom anglunes kio Rokycany, u dikhlo e phagerdži khangeri, sas oda angle mande but nalačho dikhipen. Adadžives, pal o panč berša but zorali buči ačhila e khangeri čačutnes sar than, kaj o manuša arakhen le Devlores, u vaš koda hin andre miro jilo radosca nača kolestar sos sas kerdo, ale majbuter angle koda, kaja savore vilikerde u kamen dijader te vilikerel paš o Del,“ phendža o Metropolita Kryštof. E orrtodoxno khangeri Rokycaňate hini but zorali na ča koleha, kaja la lidžal o romano ortodoxno rašaj, ale majbuter koleha, kaj del le manušen bari zor andre lengero spiritualno dživipen the le Romen andre romani komunita. Koleha, kaja pes phundradža e nevi fara pes buchlaren o šajipena le manušenge u majbuter le romane čhavorenge the le ternenge, save chuden bari šancija te arakhel peskero than. Kade pes lenge phundravel o vudar, oda hin than, kaj len ela pačiv, savi len avrether nakamen te den vaš koda, kaj hine Roma.

Dezider Giňa