Andre amaro dživipen mušinas sako džives te prikerel varesave cikneder, abo bareder pharipena. Varekana pre amende peren problemi, save amenge keren bare komplikaciji. Majbuter hin pahare problemi, save aven maškar o manuša. Andre kada hin but phares te arakhel zor the drom, so lenca te kerel.

O dživipen maškar o Roma the gadže hin but komplikimen imar čirlatunestar, o gadže namište terdžon kio Roma, u kaleha pes del phares vareso te kerel. Te nadikhaha ča pre koda, sar sas o Roma murdarde anglo rasismus, e rasovo diskriminacija perel pro Roma dijader sako džives avke the kavke. Majbuter hin koda, kaj le Romen namuken andro karčmi the kode, kaj pes vareso bikenavel. Pal kada pes del duma but berša, kajča savoro ačhol kaveke, sar hin. Andre kadi phuv mek hin but thana, save hin ča „anglo parne.“ Hin čačipen, kaj vareso pes kerel čepo feder, kaj o rasismus imar nane avke phundrado sar varekana sas. Mek nadočirla sas avke, kaj le Romenge save kamenas te džal andre karčma phenenas andro jakha: „Džan adarik, ade le kalen nakamas.“ Adadžives pes phenel vareso aver: „Prebačinen, ade hin pherdo.“
Nadočirla pes vareso kajso ačhila romaňa famelijake, savi kamla te cinel pro adošagos visavačis kavke, sar sas andro inzeratos. Ode sas phendo, kaj te vareko kamel vareso te cinel pro adošagos, tel deš minuti ela savoro kisno. O Roma gele te mangel visavačis, kajča e šerali gadži lenge phendža, kaj te aven tel jepaš ora. Sar avile, ta lenge phendža, kaj mek mušinel vareso te kerel, vaš oda te aven aver džives, kana lenge phendža, kaj len pro adošagos našči nič del. O Roma phučenas hoj soske. E gadži lenge naphendža nič aver ča koda, kaj len nič našči del. O Roma prindžarde, kaj oda sas rasovo diskriminacija. Phučlom lendar soske pal oda nagele dijader, soske nagele pal o zakonos savo braninel kolen so cinavkeren the so phenen aver zakoni. Phende mange, kaj pal kada nič nadžanen, u jon napačan, kaj pes vaš lenge vareko thovela vaš lengere čačipena.
Kada so pes ačhila sikavel pre koda, kaj o Roma naachalon andre peskere čačipena u napačan andro zakoni, save hin andre kadi phuv. Phundrado rasovo diskriminacija pro Roma pes adadžive nakerel sar varekana. Adadžives pes kerel „neutralnones“ u koda, sos sas angomis, kana le Romenge andro jakha rakinenas the kerenas pre lende phundradži rasovo diskriminacija imar adadžives nakeren, kajča koda so hin angluno, koda ačhol. Vaš kada hin le Romen čačipen, kaj napačan koleske, kaj o zakoni andre kadi phuv pomožinena the lenge. The kada perel kio problemi, save hin le Romen andre lengero sakodživesutno dživipen.

Dezider Giňa