Nadočirla diňas avri nevo CD e Martina Balogová, u sas pal late pisimen andro novini. So pes mange latar pačinelas sas koda, kaj achaľol romani duma, hjaba kaj romanes navakerel. Mištes džanas, kaj nane lokes pes te dochudel upre maškar o but prindžarde manuša. Dešvar avke phares hin sakone Romeske, saves hin varesavo talentos. Mište prindžaras e situacija, savi hin pašal e Věra Bílá. Avri la hin bari popularita, kajča andre Čechiko pes nachudel. Hin mek aver Roma, save šaj enas „hvězdy“, kajča hin len kali cipa, ta ačhon palal, hjaba hine lačhe. E Martina Balogová sikadža, kaj hini čačes „superzpěvačka“, kajča oda andre kadi phuv nane savoro. O gadže la dikhenas anglal sar Romaňa, u vaš Eda la nasas šanca te dochudel pes kode, kaj sas lakero than – „superstar.“ Kavke amare terne peren andre kajsi situacija, kaj čhiven pre sera peskero romipen. Peskeri duma, peskera da le dades. Te kamel terno Rome vareso te dokazinel, mušinel te kerel avke, kaj pre leste o romipen te dičhol so mek čineder. Kole aver, so keren le gadženge tereňáki, asistenti, poradci, ta lendar pes kamel kaj te aven kale, kaj pes te vičhinen Kotlár abo Mižigar.

U kajse problemi amenge phagen o romipen maškar o terne generaciji. E Martina Balogová phenel pativaha, kaj hini romani. Hin angle late bare šanciji, u lakero talentos hin kajso baro, kaj o gadže mušinen te thovel tele o šero u te phenel „Ano, to je zpěvačka.“ Kajča so ela kole avrenca? Savore našči keren tereňáken. Kada pes sikavel sar baro dilema, saveha nadžanas so te kerel. Hin amen talentimen čhavore, kajča lengero talentos našľol, bo nachuden šanca. Kolen, saven hin bacht u varekaj pes dochuden dijader, ta mušinen te rodel drom, sar pestar te odčhiven peskero romipen. Mek goreder pre saoreste hin koda, kaj varesave džene džan andre kada savoro kavke, kaj visaľon kontra le Romenge. Hin oda sakovar kajse, saven hin o muj kalo sar piri, varekana dživenas andro patave, u paľis pestar keren bare rajen. Kajse manuša hin amari mekbareder bibacht. Pre kada pes sikhavel, kaja o čačutne pativale Roma polokes našľon, u avela amen baro problem koleha, kaj te zalikeras amri romaňi duma the amro romipen. Mek hin romane generaciji, save kada prindžaren, kajča imar hin čino. O terne hine buter študimen sar o phureder, kajča o romano jilo lenge chibalinel. Vaš Eda sas mange šukares sar gendžom, kaj e Martina Balogová achaľol romanes.

Dezider Giňa