Devlestar adaj som, paľikerav, kalo som
andre mande jilo marel, dživav, aver som.
Lolo rat? He miro hin lolo rat, manuš som.
Dživipen? Diňas man tiž miro dad, adaj som
jekh avrestar uľol, mandar uľile tiž čhavore

Nipos but pre luma hin, aver sam savore
phrala, pheňa sam, la datar čhavore
jekhe ratestar sam, fajtos na sam savore
Pačiv man den o Roma, hijaba kalo som
Jon? Jon džanen, kaj manuš som.

Parne? Naveha mange na phenen
kalo man vičhinen, kaske ladž?!
Devleskre čhave, čikatar, paňestar sam savore
kaľi phuv del amen zor, godži, dživipen, maro.
Pačiv nane, soske? Kaj som kalo?

Kale bala man hin, dživav, rado som,
kaľi cipa man hin, o Del diňas, adaj som
jakha man hin, pindre, vasta, muj, šero
aver parsuma nane, so tumen san, he me som
oda miro savoro, som leskro čhavoro.

Baripen na kerav, na dživav, na merav, šunen?
O kham tačarel, o paňi hin dživipen.
So mek buter kampel, savo čačipen?
Kaj dživel chochaviben, nane smirom, nane kamľipen.
Kalo som, te dičhol som, soske man na dikhen?
Manuš som.