Avka sar aver berša,ta the ada berš o čhavore užarnas pro džives kana avena imar o prazdňini, the kana chudena o visvedčeňě. Doužarde pes, 30. junos has andre škola agorutno džives. Sar o učiteža o učitežki ta avka isto has oda džives upre urde the o čhavore. Savore jekhetane bares radisažonas. Amare romane čhavore denas le učitežken bari pačiv, thovnas lenge andro vast o kvetki, the aver darunki so ande kheral.

Le čhavoren imar hin o prazdňini. Hin len bari radosca, aže te na bisteren jak savore musaj bares te merkinel, te del pozora sar o dada, sar o daja bo žinajutne dživesa pes ačhel bare něščesci. Musaj te džanel kaj o čhavore džan, kaj hine, so keren the ko hin lenca. Le cikne čhavorenca kamel te avel furt bardko phureder ko dela pre lende bari pozora u te kampola, ta šigitinela lenge. Nane tromal te avel pro kham calo džives u te imar avka hin, ta musaj pes te te makhel mascaha kaj manušen te nalabarel o kham upre. Sar džan o čhavore andro veš, ta musaj te del tiž bari pozora pro cikne kirmore so pes lenge phenel klišťata. Sar aven khere andal o veš, ta o daja bi kamenas len te predikhel či pes nachudžas pre lende oda kirmo. U te imar pes avka ačhžas, ta musaj te džal le čhavoreha abo la čhajoraha ko doktoris u jon imar kerna o poradkos savo kampol. Sar džan o čhavore pal o drom, ta musaj te del tiž bari pozora. Všadzi hin but motora u o čhavore mušinen te phirel pal e žavo sera. U nekhfeder hin te phiren pal o chodňikos. Amaro the tumaro Romano hangos tumenge žičinel šukar khameskre džives, tato paňi, bari bacht, sascipen the mabisteren te merkinel pre peste.

Gejza Horváth